تاج ثم تاج ثم تاج ثم اخيرا برضه تاج

ده تاج جالي من zozo مدونه نبضات قلب وبشكرها جداا عليه وبتاسف جداا

علي التاخير في الاجابه عليه ومستني

انها تحل التاجين بتوعي استعجلوها بقي علشان لسه جايلها كمان شويه تيجان في السكه

اول سؤال من انت؟

من انا هقول الاجابه المفضله عندي دايما iam what iam

تانى سؤال: بطاقتى الشخصية

الاسم : حسن احمد حسن حنفي

اهو الاسم الرباعي كمان مش بخيل ولا حاجه

تاريخ الميلاد : 27\ 3\ 1993

عارف اني لسه صغير بس يلا بقي بكره العيال تكبر

من المنصوره

الديانه : مسلم

الحاله الاجتماعيه : اعزب ولله الحمد

بس رسائل بقي شخصيه علي جنب كده :

1- مش هشترك في الحزب بتاعكم برضه وهاخد اللي عاوزه منه وهخليه تبعي يا (.......)

تالت سؤال : ماهى احلامك؟

احلامي حاليا اني اكون فكر كويس اعرف اواجه بيه اي حد واتناقش بيه مع اي حد زي (.......)

واني ادخل كليه هندسه اللي انا بتمناها ان شاء الله

واني ارضي ربي ودي شايفها اصعب حاجه وققرب منه

رابع سؤال: من اقرب شخص ليك؟

قرب شخص ليا توفي وهو جدي الله يرحمه بعديه ماما وبابا واخواتي

بس دول ققرب اشخاص ليا كعائله

اما كاصدقاء وكشخص احكيله اسراري فهو حسام يحيي

والشخص التالت (.......) هو عارف نفسه كويس

تهدي التاج ده لمين ؟؟

البنت الشقيه .... امي ثم امي .... قطع السكر ... كيارا... اوريجينال هيرت... جيلان

القلم الجريح... انسان بلا عنوان ...حنين القلب....احنا حبايب.. لا والف لا... اجمل ايامنا....

يويو... غلطه مطبعيه.... fokaak meny

رحيل... طالب مصري.... وتدور الساقيه....نور الاسلام .... ملائكيه .... عاشقه النقاب...

البصيره.... صوت الحريه.... دروب الحياه

******************************

والتاج ده برضه من نبضات قلب لان الصراحه كانوا تاجين في بعض

بس تاني مستني انها تحل التاجين بتوعي

اول سؤال: اية معنى السعادة من وجهة نظرك ؟ حاسس انك سعيد ؟

السعاده هي ان الانسان يحقق ذاته وكيانه وانه يرضي ربه ويكون مصدر سعاده للاخرين

بس للاسف انا مش حاسس اني سعيد

تانى سؤال: امتى حسيت انك ظلمت انسان ولية ؟ محتاج للحظة غفران منة ؟

يااااااااااه ومين فينا مش ظلم حد بس للاسف انا فعلا ظلمت وممكن اكون ظلمت ناس كتير

ومنهم نفسي يعني انا اما ققصر في

عبادتي يبقي ظلمت نفسي وهكذا ومحتاج لحظه غفران من كل الناس اللي ظلمتهم

بلا استثناء حتي اللي هم غلطوا فيا وظلمي ليهم كان رده فعل

تالت سؤال: بتعمل اية لما تكون مضايق بعد ما تصلى ؟

الصراحه مش بتحصل كتير اني بكون متضايق بعد اما اصلي

لاني بعد الصلاه بحس براحه بس اعتقد انها لو حصل حاجه زي

كده ومن غير تجمل هكمل عادي مش اعتقد اني هعمل حاجه

رابع سؤال: امتى حسيت انك اتظلمت ؟ ولية ؟

انا زي اما ظلمت كتير اتظلمت اكتر بس ليه دي الصراحه مش فاكر

بس مين فينا برضه مش اتظلم

خامس سؤال : اية اكتر احساس بيراودك هذة الايام تجاة نفسك والاخرين ؟

تجاه نفسي : تجاه نفسي بحس اني مقصر في عبادتي واني ممكن اسبب في اذي لنفسي

الاخرين : هذه الايام مش فيها جديد بالنسبه للاخرين

سادس سؤال: امتى ممكن تتنازل عن حق من حقوقك ؟ والسبب ؟

مش اعتقد اني ممكن اتنازل عن حق من حقوقي الا لبابا او ماما و(.....)

او لظروف جبريه يعني ممكن حد عاوز اخد حقي

منه وهو مثلا تعب ممكن ساعتها اتنازل عن حقي علشانه

ومعظم المواضيع بتنازل عن حقي فيها للاسف

لاني بكون مكسوف وده شيء بحاول اتخلص منه

تهدي التاج ده لمين ؟؟

مدحت محمد .... البحث عن زنوبه... رد الي روحي ....

تراقيعووووو....لاللسكوت ......حبيبه الرحمن.... المبرج المحترف.... عاشقه الاقصي ....

حكاوي بنات....عالم جيجي الصغير ... امي ثم امي ... البنت الشقيه...

قلب ابيض ... عصفور في الاسر .... الشاعر.... عالم حبيب.. نبض قلب... صوره ساخره....ابي

story of life .....angel love..ازياء

فكره حره .....فراشه الحيزران....المبرمج المحترف ..... وتدور الساقيه... ورقه شجر

***********************

ده بقي احب اعرفكم عليه تالت تاج من قطع السكر احيانا لاتحلي ان شاء الله يجي عليها يوم وتدوب

وكمان في كبايه شاي سخنه احسن بقي

نياهاهاهاهاهاها

1- مين الذي دبسك في هذا الواجب ؟

مش عارف ازاي مين الذي طب من الذي او مين اللي بس يلا بقي المهم

هي مدونه قطع السكر احيانا لاتحلي

وزي ما اتفقنا هي هتدوب بقي

2-اذكر القوانين المتعلقه بالواجب ؟

انها تدوب برضه وكده هي دابت تلات مرات احسن

ولسه دي هتدوب كتير اصبروا بس

يارب مش تقول عاوزه ادوب في عصير ليمون هو شاي سخن يعني شاي سخن بس

نياهاهاهاها

3- اذكر سته اسرار قد لا يكتشفها من يقابلك اول مره ؟

الصراحه اللي يقابلني اول مره مش بيكتشف الا حاجه واحده بس اني بتكسف جداااااا

بكون مكسوف حتي النخاع بكون عامل

زي الكتكوت المبلول علشان كده هو مش بيعرف يكتشف اي حاجه عني للاسف

4- اذكر 16 صفة عن نفسك ؟

وات وات وات 16 صفه انا اصلا مش فيا 16 صفه

ههههههههه

بس هحاول

1) خجوووووووووول حتي النخاع بتكسف جداا جداا

واسالوا اي مدون قابلني بكون شبه

العصفور الكناريا ( ههههههههه) بس فيه حد عزيز عليا قالي

اكتب بس جرئ ومش بتكسف

عند الحق والله اعلم بس انا مش كنت كاتبها

2) اني بتكلم كتيييير بس اما اكون مع حد بعرفه مش مع اي حد

يعني بمجرد اما اتعود علي حد ببدا اتكلم معاه

ويعرف اني برغي كتير

3) اني بميل للهزار عن الجد يعني بفضل اني اهزر بس ساعه الجد ببدا اتكلم جد

4) اني مش بعرف اكتم حاجه جوايا اللي بزعل منه بقوله اني زعلان منه وكده

5) اني بتعصب بطريقه فظيعه ربنا يارب يبعد العصبيه عن اي حد بس

بجد انا بتعصب بشكل مبالغ فيه جداا لدرجه اني ممكن

ارمي اي حاجه قدامي واكسرها وللاسف ده سعات بيخلي ناس كتير تزعل مني

6) اني مش بعرف اقول لحد لأ وده برضه تحت بند الكسوف يعني لو حد قالي

اعمل حاجه بقوله حاضر حتي لو مش قادر

وتعبان جداا بس بقوله حاضر علشان بكون مكسوف اقوله لأ

7) طيب جداا وللاسف بطريقه فظيعه بس بدات اخف منها شويه بس كل اما اخف ارجع

8) مش بحب المذاكره خالص ولاحتي بذاكر يعني بذاكر كده خمس دقايق قبل الدرس

الا الرياضه دي بقي

هي احسن ماده عندي واحسن حاجه بعملها في حياتي هي والتدوين والكوره طبعا

9) اني احيانا بكون متسرع جداااا وباخد القرار بسرعه من غير التفكير

في عواقبه بس بدات اخف شويه وافكر قبل القرار

10) اني خبيث فعلا بس مش مع اي حد ومش الخبث اللي هو شرير ده

لأ ههههههه يعني ممكن الخبث الطيب يعني في الهزار

وكده واما احب اضحك مع حد علي راي واحد قريب مني جداا بيقولي كل شويه هتهبلني

11) اوحش صفه فيا بقي وهي اني مش بحب اي اكل

يعني مش بحب السمك الا البوري والمقلي ولا الفراخ ولا اي نوع من

الخضار ولا اللبن ولا البيض وقيس علي كده معظم الاكل وده اللي اتسبب اني اكون ضعيف

يا عيني ومش بعرف اتشاكل بس بعوض بلساني بقي

12) اني بستخدم لساني كتيييييييير اكتر من ايدي في كل المواقف يعني واحد صاحبي

كان بيقولي انت حمار قلتله لو اناحمار بيقي انت

فاهم كلامي ازاي الا لو انت حمار زيي او كداب وانا مش حمار

13) مش بحب ان حد يحاول يجبرني علي رأيه ودي اكتر حاجه بكرهها

14) اني غلس جدااا جدااا بس غلاسه حلوه برضه يعني غالسه بهزار

بس للاسف سعات بتزيد معايا واحسن بلذه اما الاقي اللي

قدامي بيضربني من غيظه اما اغلس عليه وغالبا بتكون اختي الصغيره

ههههههههههه

15) مش بحب اكون السبب في ايذاء حد او اني اكون السبب اني اظلم حد

بس للاسف بالتاكيد ظلمت ناس كتير واذيت كتير برضه بس

نفسي يسامحوني يارب

16) اخيرا اعتقد اني مخلص لاصدقائي يعني لو صاحبي لقيته في مشكله

ومش عارف اساعده يبقي انا السبب في المشكله دي ويبقي

ايه لزمتي كصديق ليه لو مش ساعدته وخرجته منها حتي لو مش في ايدي حاجه

17) اني اما اعمل حاجه بزود فيها اوي يعني اما العب العب اوي من غير حساب

اما احل رياضه لاني مش بذاكر غيرها اصلا احل

كتير اوي واحل حتي بعد اما نخلص الامتحان اخر السنه ويكون عليا امتحان

ماده تانيه وده للاسف حصل السنه الي فاتت واني لما

اتعلق بحد اتعلق بيه اوي يعني مش عندي وسط للاسف

يااااااااااااااه تاج طويل اوي اوي اوي بس انا قلت 17 صفه مش 16 بس

الحمد لله طلع عندي اكتر من 16 صفه وانا مش عارف

5- مرر هذا الواجب ل6 مدونين

نبضات قلب ... البنت الشقيه.... ملائكيه.... امي ثم امي ... مش لاقيه اسم ....

بنت سيناء

***********************

احب اشكر الاخ medus صاحب مدونه الحريه علي التاج الخفيف ده وبجد تاج جميل

أذكر صفتين لا يعرفها من يحدثك لأول مرة ؟

1- اني بتكلم كتير اللي يقابلني لاول مره يقول الواد ده هادئ جداا

ومش بيتكلم كتير بسم الله ماشاء الله وبعدين كلها كام يوم ونتعود

علي بعض وهو مش يكون مصدق نفسه ودي جمله قالهالي

واحد عزيز عليا قالي انا كنت بسمع ان انت شقي بس مش كنت مصدق الا

اما اتعرفت عليك واتكلمنا كتير .

2- اني مش بعرف افاصل خالص ولو اشتريت حاجه من محل لايمكن اني ارجعها

وحتي لو بايظه وكمان مش ممكن اني افاصل مهما

حصل حتي لو عارف ان ده مش السعر والسعر كده غالي جدا لا وايه انا اروح اشتريه

كمان لاني اتكسف ادخل محل واسال ومش اشتري

بس بدات اخف شويه يعني بقيت ممكن افاصل شويه وكمان بقيت ممكن ادخل محل

واسال ومش اشتري ادعولي بقي

أذكر صفتين يراها الناس فيك وهى ليست كذلك ؟

ايه بقي موضوع الصفات دي انا لسه قايل 17 صفه وكمان 2 كفايه بقي

أذكر ثلاثة من مدوناتك المفضلة

كل المدونات مفضله عندي علشان كده عامل 5 ريدر

بس فيه مدونه اسبيشيل عندي وهي (.....)

ههههههه

لو معك ثلاث وردات لمن تهديها ؟

1- لبابا وماما وكل اخواتي بجد بحبهم جداا بس ليا تصرفات غريبه كده يارب يسامحوني عليها

2- ابله سهير مدرسه الرياضيات بجد وقفت معايا كتير وخلتني احب الرياضيات

3- لكل المدونيين لانهم حسسوني احساس مختلف وغيروا حاجات كتير جوايا فبجد شكرا لكل المدونين

من هو افضل رئيس عربى برأيك برر بسببين ؟؟

مش شايف اي رئيس عربي كويس بس افضل رئيس بالنسبه ليا

هو احمدي نجاد

شئ فعلته وندمت ؟

مش عارف بجد بس بالتاكيد عملت حاجات كتيروندمت عليها

شئ لم تفعله وبردو ندمت ؟

اني مش عملت كل اللي عليا السنه اللي فاتت لاني كان زماني جبت درجه احسن من دي

لاني بصراحه عملت ربع الي عليا ويمكن اقل

تهدى التاج لمين ؟

طريق الشباب.... رغي امراه غير مطحونه... اجنحه الشباب....

انامسلمه ... عجبي .... ميتافيزقيا ...new hope.. تنهيده.... انطلاقه.....كله عادي....

البحر... قصاقيص... زي الهوا... جني....تظبيط

قلب مصري... الحريه.... حطم قويدك....

رؤيه.... الشاعر.... مش هبقي جيلي...نور الاسلام .. الملاك

مصر في خطر... نهر الحب....قراشه الحيزران... الباحث عن المتاعب

... امي ثم امي .... البنت الشقيه

في النهايه عارف اني طولت اوي بس اعمل ايه بقي

واللي نسيته يقولي ومش يتكسف لانه الزهيمر من كتر التيجان الي حليتها نساني

واعتذر لمدونه كله عادي لاني طلعت حالل التاج بتعها

ولس فيه تاجين او تلاته بس المره الجايه بقي